अनेमसंघ दोलखाको ९औँ पूर्ण बैठक : संगठन सुदृढीकरणसँगै महिला सशक्तीकरणमा जोड।
दोलखा । अखिल नेपाल महिला संघ (अनेमसंघ) दोलखाको ९औँ पूर्ण बैठक संगठनका आगामी गतिविधि र महिला सशक्तीकरणका महत्वपूर्ण विषयमा छलफल गर्दै सम्पन्न भएको छ।
अनेमसंघ दोलखाका अध्यक्ष मेनुका सुवेदीको अध्यक्षतामा सम्पन्न बैठकमा अनेमसंघ स्थायी कमिटी सदस्य शारदा राना प्रमुख अतिथिका रूपमा सहभागी हुनुभएको थियो। कार्यक्रममा अनेमसंघ केन्द्रीय सदस्यहरू उर्मिला थामी, शान्तिकुमारी तामाङ र कालिका पाठकको विशेष उपस्थिति रहेको थियो।
बैठकमा बागमती प्रदेश सचिवालय सदस्य गोमा केसी र मैना नेपाली, नेकपा (एमाले) दोलखाकी उपसचिव तथा भीमेश्वर नगरपालिकाकी उपप्रमुख कमला बस्नेत, अनेमसंघ पूर्व बागमती प्रदेश कमिटी सदस्य पार्वती खड्का, जिल्ला सल्लाहकार कमिटी सदस्य गायत्री आचार्य, पार्वती कार्कीलगायतको सहभागिता रहेको थियो।
बैठकले अनेमसंघको सांगठनिक गतिविधिलाई थप प्रभावकारी बनाउने, महिलाको राजनीतिक तथा सामाजिक सहभागिता बढाउने र महिला अधिकारका सवाललाई सशक्त रूपमा उठाउने विषयमा छलफल गरेको छ।
महिला नेतृत्व विकास, समान अवसर, सहभागिता र सशक्तीकरणलाई प्राथमिकतामा राख्दै संगठनलाई अझ व्यवस्थित, गतिशील र जनमुखी बनाउने निष्कर्षसहित बैठक सम्पन्न भएको अनेमसंघ दोलखाले जनाएको छ।
