भीमेश्वर नगरपालिकाले वितरण गरेको खुमल–१६ धानको बीउ लगाएपछि बाली बिग्रिएको किसानको गुनासो।
महेन्द्र श्रेष्ठ / दोलखा
दोलखा । भीमेश्वर नगरपालिकाले वितरण गरेको खुमल–१६ जातको धानको बीउ लगाएका वडा नं. २ र ५ का किसानको धानबाली बिग्रिएको छ। धानको अवस्था बिग्रिएपछि किसान चिन्तित बनेका छन्।
किसानले मुठी खाएर माना फलाउने आशामा खेतमा धान रोपेका थिए। तर अहिले धानबालीको अवस्था बिग्रिएपछि वर्षभरि खाने अन्न उत्पादन गर्ने सपना प्रभावित हुने चिन्ता बढेको छ।
प्राप्त तस्बिरमा धानका बाला र पात सुक्दै गएको तथा बालीको अवस्था कमजोर देखिन्छ। वडा नं. २ र ५ मा खुमल–१६ धान लगाएका किसानले यस्तो समस्या भोग्नुपरेको बताइएको छ। यद्यपि, कति किसानको कति क्षेत्रफलमा क्षति पुगेको छ भन्ने विवरण खुल्न बाँकी छ।
नगरपालिकाले वितरण गरेको बीउ लगाएपछि धानबालीमा समस्या देखिएको किसानको गुनासोपछि बीउको गुणस्तर र वितरण प्रक्रियामाथि प्रश्न उठेको छ। यस विषयमा सम्बन्धित निकायले गम्भीरतापूर्वक चासो दिनुपर्ने देखिन्छ।
धानबाली बिग्रिनुको वास्तविक कारण पत्ता लगाउन कृषि प्राविधिकबाट तत्काल स्थलगत निरीक्षण तथा बीउ र बालीको परीक्षण गराउन आवश्यक छ। समस्या बीउको गुणस्तरका कारण भएको पुष्टि भएमा जिम्मेवार पक्षको पहिचान गरी प्रचलित कानुनअनुसार आवश्यक कारबाही र किसानलाई क्षतिपूर्तिको व्यवस्था गर्नुपर्ने हुन्छ।
किसानको मेहनत र लगानी जोखिममा परेको अवस्थामा भीमेश्वर नगरपालिकाले यस विषयमा आफ्नो धारणा सार्वजनिक गर्दै प्रभावित किसानको समस्या समाधानका लागि पहल गर्नुपर्ने देखिन्छ।
किसानको पसिना र लगानीबाट उत्पादन हुने अन्नमै समस्या देखिँदा यसको जिम्मेवारी कसले लिने? सम्बन्धित निकायले समयमै छानबिन गरी वास्तविकता सार्वजनिक गर्नु आवश्यक छ।
