पत्रकारिताबाट राष्ट्रिय राजनीतिसम्मको यात्रा, दोलखाका लागि गौरव!
महेन्द्र श्रेष्ठ
नेपाली कांग्रेसको १५औँ महाधिवेशनबाट खुला कोटामा लोकप्रिय मतसहित सहमहामन्त्री पदमा निर्वाचित हुनुभएका दोलखाका नेता अजयबाबु शिवाकोटीलाई हार्दिक बधाई तथा सफल कार्यकालको शुभकामना।
पत्रकारितामार्फत समाजका आवाज उठाउँदै, जनताका समस्या उजागर गर्दै र लोकतन्त्र, प्रेस स्वतन्त्रता तथा सुशासनका पक्षमा कलम चलाउँदै आउनुभएका शिवाकोटीको राजनीतिक यात्रा पत्रकारिता क्षेत्रका लागि पनि चासो र चर्चाको विषय बनेको छ।
पत्रकारिता केवल समाचार सम्प्रेषण गर्ने माध्यम मात्र होइन, समाजलाई सही दिशा देखाउने, सत्तालाई खबरदारी गर्ने र नागरिकका आवाजलाई सम्बन्धित निकायसम्म पुर्याउने महत्त्वपूर्ण जिम्मेवारी पनि हो। यही क्षेत्रमा हासिल गरेको अनुभव, जनसम्पर्क र सार्वजनिक मुद्दाप्रतिको बुझाइलाई उहाँले सक्रिय राजनीतिमा समेत उपयोग गर्न सक्ने अपेक्षा गर्न सकिन्छ।
पत्रकारिताबाट सक्रिय राजनीतिमा प्रवेश गरी छोटो समयमै पार्टीको केन्द्रीय पदाधिकारीको जिम्मेवारीमा पुग्नु उहाँको राजनीतिक यात्राको उल्लेखनीय उपलब्धि हो। यसले पत्रकारिता क्षेत्रबाट पनि राष्ट्रिय राजनीतिक नेतृत्वमा पुग्न सकिने सम्भावनालाई उजागर गरेको छ।
दोलखाको राजनीतिक इतिहासमा नयाँ पहिचान स्थापित गर्न सफल हुनुभएका अजयबाबु शिवाकोटीको यो उपलब्धि व्यक्तिगत सफलता मात्र नभई जिल्लाकै लागि गौरवको विषय हो। आगामी दिनमा उहाँले लोकतान्त्रिक मूल्य, प्रेस स्वतन्त्रता, नागरिक अधिकार र जनताका सवाललाई प्राथमिकतामा राख्दै थप प्रभावकारी भूमिका निर्वाह गर्नुहुनेछ भन्ने अपेक्षा गरौँ।
हार्दिक बधाई तथा सफल राजनीतिक कार्यकालको शुभकामना!
