आशा बोकेर नेतृत्वको यात्रामा अध्यक्षका उम्मेदवार दिनेश पाठक।
महेन्द्र श्रेष्ठ
दोलखाको/ व्यापारिक क्षेत्र फेरि एकपटक नयाँ मोडमा उभिएको छ । उद्योग, व्यापार र उद्यमको भविष्य कसले सम्हाल्ने भन्ने बहस सुरु भएसँगै अहिले व्यवसायीहरूबीच एउटा नाम निकै चर्चामा छ — दिनेश पाठक ।
वर्षौंदेखि व्यवसायीहरूको सुख–दुःखमा साथ दिँदै सङ्घको यात्रासँग जोडिनुभएका पाठक अब दोलखा उद्योग वाणिज्य सङ्घको अध्यक्ष पदका लागि मैदानमा उत्रिनुभएको छ ।
उहाँको उम्मेद्वारी केवल पद प्राप्तिको चाहना होइन, निराश बन्दै गएको व्यापारिक क्षेत्रलाई फेरि उठाउने, व्यवसायीहरूमा हराउँदै गएको आत्मविश्वास फर्काउने र बजारमा नयाँ आशा जगाउने प्रयासका रूपमा हेरिएको छ ।
पछिल्ला केही वर्ष दोलखाको व्यापारिक क्षेत्रले असाध्यै कठिन समय भोग्यो । कोभिड–१९ को महामारीले बजार सुनसान बनायो, आर्थिक मन्दीले कारोबार खस्कियो, बैंकको चर्को ब्याजदरले व्यवसायीहरूलाई झन् थिच्दै लग्यो । कतिपय उद्यमीले आफ्ना सपनाहरू बन्द पसलसँगै थन्क्याउन बाध्य भए ।
बजारमा पहिलेको चहलपहल हराउँदै गयो, व्यवसायीहरूको अनुहारमा निराशा बढ्दै गयो ।
यही कठिन घडीमा व्यवसायीहरूको माझमै रहेर उनीहरूको समस्या सुन्ने, पीडा बुझ्ने र समाधानका लागि पहल गर्ने व्यक्तिका रूपमा दिनेश पाठकलाई धेरैले अनुभव गरेका छन् । त्यसैले अहिले उहाँको उम्मेद्वारीलाई धेरै व्यवसायीहरूले “आशा र भरोसाको उम्मेद्वारी” का रूपमा हेर्न थालेका छन् ।
भिलेज खबरसँग कुराकानी गर्दै पाठकले भावुक हुँदै भन्नुभयो,
“दोलखाको बजार केवल व्यापार गर्ने ठाउँ मात्र होइन, हजारौं परिवारको सपना र भविष्य जोडिएको ठाउँ हो । व्यवसायीहरू निराश हुँदा बजार मात्रै होइन, समाज नै कमजोर बन्छ । त्यसैले म नेतृत्वमा आएर व्यवसायीहरूको मनोबल उठाउने, सङ्घलाई अझ बलियो बनाउने र व्यवसायीहरूलाई एकताबद्ध गर्ने लक्ष्यसहित अघि बढेको छु ।”
सङ्घमा उहाँको यात्रा पनि लामो अनुभवले भरिएको छ । एक कार्यकाल कार्यसमिति सदस्य र अर्को कार्यकाल प्रथम उपाध्यक्षको जिम्मेवारी सम्हालिसक्नुभएका पाठकले सङ्घको आन्तरिक अवस्था, व्यवसायीहरूको आवश्यकता र दोलखाको व्यापारिक सम्भावनालाई नजिकबाट बुझ्ने अवसर पाउनुभएको छ ।
उहाँ निकट व्यवसायीहरूका अनुसार पाठक मिलनसार, समन्वयकारी र सबैलाई साथमा लिएर अघि बढ्ने स्वभावका व्यक्ति हुनुहुन्छ । समस्या पर्दा अगाडि उभिने, व्यवसायीहरूको आवाज सुन्ने र सानो–ठूलो नभनी सबैलाई समान व्यवहार गर्ने उहाँको शैलीले धेरैको मन जितेको बताइन्छ ।
सुरुवातमा सर्वसम्मत नेतृत्व चयनको प्रयास भए पनि त्यो सफल हुन सकेन । सहमतिबाट नेतृत्व चयन हुने सम्भावना कमजोर बन्दै गएपछि अब निर्वाचनमार्फत नयाँ नेतृत्व चयन हुने लगभग निश्चित बनेको छ । त्यसैले पाठक अहिले आफ्नो सशक्त टिमसहित चुनावी तयारीमा जुट्नुभएको छ ।
उहाँले आफू एक्लै नेतृत्वमा पुग्ने भन्दा पनि इमानदार, सक्षम र व्यवसायीहरूको पक्षमा उभिने टिम निर्माणमा केन्द्रित रहेको बताउनुभएको छ । उहाँको भनाइमा,
“संस्था एक व्यक्तिले मात्रै चल्दैन । राम्रो सोच, स्पष्ट योजना र इमानदार टिम भयो भने मात्रै संस्थालाई सही दिशामा अघि बढाउन सकिन्छ ।”
पाठकले दोलखाको व्यापार क्षेत्रलाई आधुनिक र व्यवस्थित बनाउने, स्थानीय उत्पादनको बजारीकरण गर्ने, पर्यटनसँग व्यापारलाई जोड्ने, युवा उद्यमीहरूलाई प्रोत्साहन गर्ने तथा व्यवसायीहरूको हकहितका लागि सशक्त आवाज उठाउने प्रतिबद्धता व्यक्त गर्नुभएको छ ।
उहाँका अनुसार अहिले सबैभन्दा ठूलो आवश्यकता व्यवसायीहरूमा हराउँदै गएको आत्मविश्वास फर्काउनु हो । बजारमा फेरि चहलपहल ल्याउने, उद्यमीहरूलाई उत्साह दिने र दोलखाको व्यापारिक वातावरणलाई नयाँ ऊर्जा प्रदान गर्ने सपना उहाँले बोकेको देखिन्छ ।
दोलखा उद्योग वाणिज्य सङ्घको १६ औं अधिवेशन तथा २५ औं साधारणसभा यही वैशाख ३१ गते चरिकोटमा हुँदैछ । अधिवेशनले अध्यक्षसहित १८ सदस्यीय नयाँ कार्यसमिति चयन गर्नेछ ।
अधिवेशन नजिकिँदै जाँदा दोलखाको व्यापारिक क्षेत्र चुनावी माहोलले तातिन थालेको छ । यही बीच दिनेश पाठकको उम्मेद्वारीले व्यवसायीहरूबीच नयाँ चर्चा, नयाँ आशा र नयाँ अपेक्षा जन्माएको छ ।
अब हेर्न बाँकी छ — व्यवसायीहरूको त्यो भरोसा र विश्वासलाई मतमा बदल्दै दिनेश पाठक दोलखा उद्योग वाणिज्य सङ्घको नेतृत्व सम्हाल्न सफल हुनुहुन्छ कि हुनुहुन्न ।
