भरोसाको केन्द्र बन्दै दिनेश पाठक प्यानल
दोलखा उद्योग वाणिज्य संघको निर्वाचनमा अनुभवी र सक्रिय टोली
मैदानमा
महेन्द्र श्रेष्ठ
दोलखा, चरिकोट ।
दोलखा उद्योग वाणिज्य संघको आगामी निर्वाचनका लागि दिनेश पाठक नेतृत्वको प्यानलसहित विभिन्न पदका उम्मेदवारहरूको अन्तिम नामावली सार्वजनिक गरिएको छ। निर्वाचन उप–समितिले दाबी–विरोधमाथिको छलफल तथा निर्णयपछि अन्तिम उम्मेदवार सूची प्रकाशन गरेको जनाएको हो।
अध्यक्ष पदमा व्यवसायी दिनेश पाठकले उम्मेदवारी दिएका छन् भने उहाँसँग प्रतिस्पर्धामा सन्तन थापा रहेका छन्। व्यवसायीहरूको हकहित, संस्थागत सुदृढीकरण तथा जिल्लाको व्यापार–व्यवसाय प्रवर्द्धनलाई मुख्य एजेन्डा बनाउँदै पाठक नेतृत्वको टिम चुनावी मैदानमा उत्रिएको छ।
दिनेश पाठक प्यानलबाट वरिष्ठ उपाध्यक्षमा विमल श्रेष्ठ, उपाध्यक्षमा बलराम थापा, महिला उपाध्यक्षमा कल्याणी श्रेष्ठ, महासचिवमा राजन थापा, सचिवमा हिमाल प्रसाद न्यौपाने तथा कोषाध्यक्षमा चन्द्र बहादुर तमाङ उम्मेदवार रहेका छन्।
त्यसैगरी दलित सदस्यमा हरिकृष्ण नेपाली, महिला सदस्यमा लक्ष्मी बस्नेत चौलागाईं, शाखा सदस्यहरूमा माघा देउरालीबाट भक्क बहादुर श्रेष्ठ, सिँगटीबाट हिरो मित्रकोटी तथा मैनापोखरीबाट राजन कुमार दाहाल उम्मेदवार बनेका छन्। एसोसियट सदस्यमा पुष्पोत्तम बुढाथोकी तथा खुला सदस्यहरूमा गम्भीर श्रेष्ठ र बासु कुमार थापा उम्मेदवार रहेका छन्।
संघलाई थप चलायमान बनाउने, व्यवसायीका समस्या समाधानमा प्रभावकारी भूमिका खेल्ने तथा जिल्लाको आर्थिक गतिविधिलाई सशक्त बनाउने प्रतिबद्धतासहित दिनेश पाठक प्यानल चुनावी अभियानमा सक्रिय बनेको छ।
जिल्लाका व्यवसायीहरूबीच पनि पाठक नेतृत्वको टोलीप्रति सकारात्मक चर्चा बढ्दै गएको देखिन्छ।
