दोलखामा सडकबाट लडेर गम्भीर घाइते भएका युवकको उपचारका क्रममा मृत्यु
महेन्द्र श्रेष्ठ
दोलखा, असार ८ – दोलखाको भीमेश्वर नगरपालिका–१, सुस्पा क्षमावतीका एक युवकको सडकबाट लडेर गम्भीर घाइते भएपछि उपचारका क्रममा मृत्यु भएको छ। मृत्यु हुनेमा स्थानीय ३२ वर्षीय शिवजी शिवाकोटी रहेका छन्।
जिल्ला प्रहरी कार्यालय दोलखाका अनुसार सोमबार साँझ घरतर्फ जाने क्रममा शिवाकोटी अचानक सडकबाट करिब २५ मिटर तल खसेका थिए। घटनापछि स्थानीयवासीले तत्काल उद्धार गरी उनलाई उपचारका लागि धुलिखेल अस्पताल शाखा, भिमेश्वर पुर्याएका थिए। गम्भीर अवस्थामा रहेका शिवाकोटीको चिकित्सकको निगरानीमा उपचार सुरु गरिए पनि उनको ज्यान बचाउन सकिएन।
उपचारकै क्रममा सोमबार राति करिब पौने ९ बजे चिकित्सकले शिवाकोटीलाई मृत घोषणा गरेको जिल्ला प्रहरी कार्यालय दोलखाले जनाएको छ। घटनापछि प्रहरी टोलीले घटनास्थल पुगेर आवश्यक अनुसन्धान थालेको छ।
प्रहरीको प्रारम्भिक अनुसन्धानबाट शिवाकोटी मादक पदार्थ सेवन (मापसे) गरी हिँडिरहेको अवस्थामा अनियन्त्रित भई सडकबाट लडेको देखिएको छ। यद्यपि घटनाको वास्तविक कारणबारे थप अनुसन्धान भइरहेको प्रहरीले जनाएको छ।
यस घटनाले स्थानीय क्षेत्रमा शोकको वातावरण सिर्जना गरेको छ। मादक पदार्थ सेवनपछि हुने जोखिमप्रति सचेत रहन तथा हिँडडुल गर्दा विशेष सावधानी अपनाउन प्रहरीले सर्वसाधारणलाई आग्रह गरेको छ।
