असारको चटारो: दोलखाको बेसीफाँटमा धमाधम धान रोपाइँ, ढिलो वर्षाले काम प्रभावित।
– महेन्द्र श्रेष्ठ
दोलखा, असार २३ – दोलखाका बेसीफाँट क्षेत्रमा यतिबेला असारको चटारोसँगै धान रोपाइँ तीव्र रूपमा भइरहेको छ। बिहानदेखि साँझसम्म किसानहरू हिलोमा पस्दै रोपाइँमा व्यस्त देखिएका छन्। खेत–खेतमा रोपाइँको चहलपहल बढेसँगै ग्रामीण बस्तीमा असारे खेतीको रौनक फर्किएको छ।
यस वर्ष मनसुन तथा आकाशे वर्षा ढिलो सुरु भएकाले धान रोपाइँको काम अपेक्षाभन्दा केही पछि धकेलिएको किसानहरू बताउँछन्। सुरुका दिनमा पर्याप्त पानीको अभाव हुँदा धेरै खेतमा रोपाइँ गर्न कठिनाइ भएको थियो। पछिल्ला दिनमा निरन्तर वर्षा हुन थालेपछि अहिले अधिकांश बेसीफाँट क्षेत्रमा धमाधम रोपाइँ भइरहेको छ भने बाँकी खेतमा पनि किसानहरूले कामलाई तीव्रता दिएका छन्।
भीमेश्वर नगरपालिका कृषि शाखाकी प्राविधिक मेनुका घिमिरेका अनुसार यस वर्ष वर्षा ढिलो सुरु हुँदा रोपाइँमा केही ढिलाइ भएको भए पनि अहिले मौसम अनुकूल बन्दै गएको छ। उहाँले किसानहरूलाई समयमै रोपाइँ सम्पन्न गर्न, सिफारिस गरिएका उन्नत धानका बीउ, सन्तुलित मल तथा आधुनिक कृषि प्रविधिको प्रयोग गर्न आग्रह गर्नुभयो। समयमै रोपाइँ सम्पन्न भए उत्पादन पनि सन्तोषजनक हुने उहाँको विश्वास छ।
धान खेती दोलखाका अधिकांश किसानको मुख्य जीविकोपार्जनको आधार भएकाले असार महिनाको रोपाइँलाई विशेष महत्त्वका साथ हेरिन्छ। किसानहरूले अनुकूल मौसम कायम रहोस् र यस वर्ष राम्रो उत्पादन प्राप्त होस् भन्ने अपेक्षासहित खेतमा निरन्तर मेहनत गरिरहेका छन्।
