अनेरास्ववियुको केन्द्रीय सदस्य तथा दोलखा इन्चार्जमा रामचन्द्र केसी मनोनीत।
शंख ध्वनि अनलाइन
दोलखा । विद्यार्थी राजनीतिसँगै सामाजिक सेवामा समेत सक्रिय युवा नेता रामचन्द्र केसी अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को केन्द्रीय सदस्य तथा दोलखा जिल्ला इन्चार्जमा मनोनीत भएका छन्।
अनेरास्ववियु दोलखाको अध्यक्षका रूपमा जिम्मेवारी निर्वाह गर्दै आएका केसीलाई सङ्गठनको केन्द्रीय कमिटीमा समेट्दै जिल्लाको इन्चार्जको जिम्मेवारीसमेत प्रदान गरिएको हो।
विद्यार्थी सङ्गठनलाई जिल्लामा थप सुदृढ बनाउन, विद्यालय तथा क्याम्पसमा सङ्गठनात्मक गतिविधि विस्तार गर्न र विद्यार्थीका शैक्षिक अधिकार एवं हकहितका सवालमा आवाज उठाउन केसी सक्रिय रहँदै आएका छन्। विद्यार्थी राजनीतिसँगै सामाजिक क्षेत्रमा समेत क्रियाशील उनले युवाहरूलाई सङ्गठित गर्ने र सामाजिक गतिविधिमा सहभागी गराउने कार्यमा भूमिका निर्वाह गर्दै आएका छन्।
नयाँ जिम्मेवारीसँगै केसीले अब अनेरास्ववियुको केन्द्रीय तहमा रहेर काम गर्नुका साथै दोलखा जिल्लाको सङ्गठनात्मक नेतृत्व र समन्वयको जिम्मेवारीसमेत सम्हाल्नेछन्।
केसीको मनोनयनसँगै दोलखाका विद्यार्थी नेता, कार्यकर्ता तथा शुभेच्छुकहरूले बधाई दिँदै सफल कार्यकालको शुभकामना व्यक्त गरेका छन्।
केन्द्रीय सदस्य तथा जिल्ला इन्चार्जको जिम्मेवारीले केसीको राजनीतिक र सामाजिक यात्रामा थप दायित्व थपिएको छ। उनले विद्यार्थीका समस्या, शैक्षिक गुणस्तर, अधिकार र अवसरका विषयलाई प्राथमिकतामा राख्दै सङ्गठनलाई थप प्रभावकारी बनाउने अपेक्षा गरिएको छ।
