मेयर गोपी हमालको भनाइ: “नागढुङ्गा सुरुङमार्गको योगदान कसैले मेटाउन सक्दैन, केपी ओलीको भूमिका इतिहासमा दर्ज छ”
दाेलखा / धनगढी उपमहानगरपालिकाका मेयर गोपी हमालले नागढुङ्गा सुरुङमार्ग निर्माणमा तत्कालीन प्रधानमन्त्री केपी शर्मा ओलीले खेलेको भूमिकाको खुलेर प्रशंसा गर्दै विकास निर्माणका कामलाई राजनीतिक पूर्वाग्रहभन्दा माथि उठेर मूल्याङ्कन गर्नुपर्ने बताएका छन्।
सामाजिक सञ्जालमार्फत आफ्नो धारणा सार्वजनिक गर्दै मेयर हमालले नागढुङ्गा सुरुङमार्गको उद्घाटन भौतिक पूर्वाधार तथा यातायात मन्त्री सुनिल लम्सालले गरेको भए पनि उक्त आयोजना अघि बढाउन, आवश्यक निर्णय गर्न र समयमै सम्पन्न गराउन तत्कालीन प्रधानमन्त्री केपी शर्मा ओलीको सक्रिय नेतृत्व र निरन्तर चासो महत्वपूर्ण रहेको उल्लेख गरेका छन्।
उनले राजनीतिक विचार र दलगत मतभेद स्वाभाविक हुने भए पनि राष्ट्रका लागि गरिएका विकास निर्माणका कामको उचित सम्मान हुनुपर्ने धारणा व्यक्त गरेका छन्। “काम गर्ने कालु, मकै खाने भालु” भन्ने नेपाली उखान उद्धृत गर्दै उनले जसले महत्वपूर्ण योगदान दिएको हो, त्यसलाई इतिहासबाट हटाउने वा ओझेलमा पार्ने प्रयास उचित नहुने बताएका छन्।
मेयर हमालका अनुसार, यदि तत्कालीन प्रधानमन्त्री ओलीले यस आयोजनालाई प्राथमिकतामा राखेर निरन्तर ताकेता नगरेको भए नागढुङ्गा सुरुङमार्गको निर्माण अझै केही वर्ष पछाडि धकेलिन सक्थ्यो। उनले यो आयोजना नेपालका लागि आधुनिक पूर्वाधार विकासको एउटा महत्वपूर्ण उपलब्धि भएको उल्लेख गर्दै देश सुरुङमार्ग निर्माणको नयाँ युगमा प्रवेश गरेको बताएका छन्।
उनले विकासका कामहरू कुनै एक व्यक्ति वा दलको मात्र नभई सम्पूर्ण देशको सम्पत्ति हुने उल्लेख गर्दै त्यस्ता ऐतिहासिक उपलब्धिमा योगदान गर्ने नेतृत्वको सम्मान गरिनुपर्ने धारणा राखेका छन्। इतिहासलाई राजनीतिक दृष्टिकोणबाट होइन, तथ्य र योगदानका आधारमा मूल्याङ्कन गर्नुपर्ने उनको भनाइ छ।
मेयर हमालले अन्त्यमा इतिहास र योगदानलाई कसैले मेटाउन नसक्ने उल्लेख गर्दै, देशको विकासमा महत्वपूर्ण भूमिका निर्वाह गर्ने नेतृत्वलाई नेपाली जनताले सधैं सम्झिरहने विश्वास व्यक्त गरेका छन्।
