देउसी–भैलोमार्फत संस्कृति संरक्षणसँगै संगठनात्मक एकताको सन्देश दिँदै दोलखा–काठमाडौं सम्पर्क कमिटी
**महेन्द्र श्रेष्ठ / दोलखा
**काठमाडौं ।** नेपाली मौलिक कला, संस्कृति, परम्परा र चाडपर्वको संरक्षण तथा प्रवर्द्धन गर्ने उद्देश्यका साथ नेकपा एमाले दोलखा–काठमाडौं सम्पर्क कमिटीको आयोजनामा देउसी–भैलो कार्यक्रम सम्पन्न भएको छ।
कमिटीका अध्यक्ष उमेश खड्काको नेतृत्वमा आयोजित उक्त कार्यक्रममा नेकपा एमालेका पोलिटब्युरो सदस्य तथा पूर्व सञ्चारमन्त्री पार्वत गुरुङ, बागमती प्रदेशका भौतिक पूर्वाधार विकासमन्त्री भरतबहादुर केसी, एमाले नेता डिल्ली बराइली, शान्ति पाख्रिनलगायत पार्टीका नेता, कार्यकर्ता तथा शुभेच्छुकहरूको उल्लेख्य सहभागिता रहेको थियो।
नेपाली समाजमा देउसी–भैलो केवल मनोरञ्जन र रमाइलो गर्ने माध्यम मात्र नभई पुस्तौँदेखि हस्तान्तरण हुँदै आएको मौलिक सांस्कृतिक सम्पदा र सामाजिक एकताको प्रतीकका रूपमा स्थापित छ। यही सांस्कृतिक महत्वलाई आत्मसात् गर्दै आयोजना गरिएको कार्यक्रममा सहभागी नेताहरू तथा कार्यकर्ताले देउसी–भैलोमा उत्साहपूर्वक साथ दिएका थिए। उनीहरूले सांस्कृतिक प्रस्तुतिमार्फत नेपाली मौलिक परम्पराप्रति सम्मान र आफ्नो सांस्कृतिक पहिचानप्रतिको प्रतिबद्धता व्यक्त गरेका थिए।
कार्यक्रममा चाडपर्वले समाजमा आपसी सद्भाव, भाइचारा, सहकार्य र आत्मीयता बढाउन महत्वपूर्ण भूमिका खेल्ने सन्देशसमेत प्रवाह गरिएको थियो। आफ्नो जन्मथलो, भाषा, संस्कृति र सामाजिक सम्बन्धबाट टाढा रहेर काठमाडौंमा बसोबास गर्दै आएका दोलखालीहरूलाई एउटै साझा मञ्चमा जोड्ने अवसरका रूपमा कार्यक्रमले विशेष महत्व राखेको थियो।
विशेषगरी काठमाडौंमा विभिन्न पेसा, व्यवसाय तथा सामाजिक गतिविधिमा संलग्न दोलखाली नेता, कार्यकर्ता र शुभेच्छुकबीच भेटघाट, अनुभव आदानप्रदान तथा आपसी सम्बन्ध विस्तार गर्न कार्यक्रमले सहयोग पुर्याएको देखिन्थ्यो। यस्ता सांस्कृतिक कार्यक्रमले राजनीतिक संगठनलाई सामाजिक तथा सांस्कृतिक गतिविधिसँग जोड्नुका साथै आपसी एकता र सहकार्यको वातावरण निर्माण गर्नसमेत मद्दत पुग्ने विश्वास गरिएको छ।
नेकपा एमाले दोलखा–काठमाडौं सम्पर्क कमिटीले आयोजना गरेको यस कार्यक्रमले चाडपर्वको सांस्कृतिक महत्वलाई उजागर गर्नुका साथै दोलखालीबीचको आत्मीयता, एकता र आफ्नो जिल्लाप्रतिको अपनत्वलाई थप मजबुत बनाउने सन्देश दिएको छ।
देउसी–भैलोको माध्यमबाट संस्कृति संरक्षणसँगै आपसी सम्बन्ध र संगठनात्मक एकतालाई थप सुदृढ बनाउने प्रयासका रूपमा कार्यक्रमलाई सहभागीहरूले सकारात्मक रूपमा लिएका छन्।
