२३ माघ, काठमाण्डौं – भिजिट भिसा प्रकरणमा मुछिएका अध्यागमन विभागका अधिकृत नरवीर खड्का सहित चार जना पुर्पक्षका लागि जेल चलान भएका छन् ।
जिल्ला अदालत काठमाडौंले मंगलबार अधिकृत खड्कासहित मनोज तामाङ, सरोज कुमार यादव र अरूण दाहाललाई पुर्पक्षका लागि कारागार चलाउन आदेश दिएको हो भने अन्य ६ जनालाई धरौटीमा छाड्न आदेश दिएको छ ।
नक्कली कागजातका आधारमा भिजिट भिसामा जानेहरूमाथि उपत्यका अपराध अनुसन्धान कार्यालयको टोलीले गत मंसिरमा अपरेसन चलाएको थियो । प्रहरी अनुसन्धानबाट नक्कली कागजात बनाउने गिरोहसँग मिलेर उनीहरूले प्रतिव्यक्ति ४० हजारदेखि माथि रकम लिएर पठाउने गरेको खुलेको छ ।
अपरेसनका क्रममा घुस लिँदालिँदै त्रिभुवन अन्तर्राष्ट्रिय विमानस्थलस्थित अध्यागमन कार्यालयका अधिकृत खड्का पक्राउ परेका थिए । २६ मंसिरमा पक्राउ परेका उनीमाथि अनुसन्धान गर्दै जाँदा अन्य कर्मचारीको समेत संलग्नता खुलेको थियो ।
