- -काठमाण्डौ समाचारदाता
४ फागुन २०८१ (१६ फेब्रुअरी २०२५)। खोटाङ्ग हलेसीमा आज ठूलो आगलागी भएको छ। स्थानीय पदम राईको ग्यास पसलमा आगो लागेको हो, जहाँ खाना पकाउने ग्याससहित थुप्रै ग्यास सिलिण्डर राखिएका थिए। आगो लागेको समय सिलिन्डरहरूको विस्फोट हुन थाल्यो, जसका कारण आगो अझै बढिरहेको छ। स्थानीयका अनुसार केही सिलिन्डरहरू अहिले पनि पड्किन थालेका छन्।
पसलमा हार्डवेयरका सामानहरू पनि थुपारिएका थिए, र ती सामानहरू पनि आगोले नष्ट गरेको छ। पानी अभावका कारण आगो नियन्त्रण गर्न कठिनाइ उत्पन्न भएको छ। आगोका लप्टाहरू फैलिने र बजारका अन्य घरमा पनि पुग्ने खतरा छ, जसले स्थानिय बासिन्दा र व्यवसायीहरूमा ठूलो चिन्ता उत्पन्न गरेको छ।
स्थानीयवासीहरूले आगो निभाउनका लागि पानीको अत्यन्तै कमी रहेको र दमकल पुग्न ढिलाइ भएको बताउनुभएको छ। बजारको आसपासमा पानीको स्रोत नहुँदा आगो नियन्त्रणमा ल्याउन निकै चुनौतीपूर्ण बनिरहेको छ। आगोको लप्टाबाट बजारका अन्य भवनहरू पनि प्रभावित हुनसक्ने चिन्ता व्यक्त गरिएको छ।
यस प्रकारको घटना अघिल्लो वर्षहरूमा पनि भएको थियो, र आगलागीका घटनाहरूको पुनरावृत्ति भएकोले स्थानीय प्रशासन र सरोकारवालाहरूको ध्यानाकर्षण भएको छ। स्थानीय प्रशासनले तत्काल राहत र उद्धार कार्य सुरु गरेको छ, तर आगलागीको पूर्ण नियन्त्रण अझै हुन सकेको छैन।
