काठमाडौं, असाेज १० । नेकपा एमालेका पोलिटब्युरो सदस्य तथा पूर्वसञ्चारमन्त्री पार्वत गुरुङले हाल उत्पन्न सङ्कटपूर्ण घटनाक्रमको फाइदा लिँदै ’धमिलो पानीमा माछा मार्ने’ काम भइरहेको भन्दै सचेत रहन सबैलाई अपिल गर्नुभएको छ ।
जेन–जी आन्दोलन र त्यसपछि सिर्जित घटनाले मूलक गम्भीर अवस्थामा पुगेको जनाउँदै पूर्वमन्त्री गुरुङले यस अवस्थाको फाइदा उठाउन मुलुकका तरमाराहरू लागिपरेकोले सत्यको पक्षमा दृढतापूर्वक उभिन जरुरी रहेको पनि प्रष्ट पार्नुभएको छ ।
नेपाली चाडपर्व बडादशैँ, दीपावली, नेपाल संवत् र छठको अवसरमा शुभकामना सन्देश दिँदै पूर्वमन्त्री गुरुङले भन्नुभएको छ, ‘ अहिले, देश इतिहास मै असहज र कठिन घडीमा छ । हरेक क्षेत्रमा स्वस्थ प्रतिस्पर्धा होइन, बदलाको भावना र आपराधिक मानसिकताबाट प्रतिशोधपूर्ण राजनीतिक गतिविधिले देशलाई आन्तरिक द्वन्द्वमा फसाउँदै दीर्घकालीन अस्थिरतामा पुर्याएर असफल राष्ट्र बन्ने खतरा बढिरहेको । हाल उत्पन्न सङ्कटपूर्ण घटनाक्रमको फाइदा लिँदै ’धमिलो पानीमा माछा मार्ने’ भने झैँ सामाजिक सञ्जाल र डिजिटल प्लेटफर्म मार्फत भ्रमपूर्ण, कपोलकल्पित, प्रायोजित, तथ्यहीन र नक्कली कथा र फेक भिडियो फोटोहरू सम्प्रेषण गरी चरित्रहत्या गर्ने समूहहरू सक्रिय छन् ।
उहाँले अगाडि थप्नुभएको छ, ‘ यसरी प्रविधिको दुरुपयोग गर्दै आपराधिक हरकतबाट समाजमा अशान्ति र अफवाह फैलाउँदै द्वन्द्व सिर्जना गर्नेहरूबाट सचेत रहनुपर्ने देखिन्छ । तसर्थ, देशको विद्यमान सङ्कटबाट विचलित नभई, उच्च मनोबलका साथ देश निर्माणमा सबै नेपाली एकताबद्ध भएर लागौँ ।’
उहाँले सत्यको सामु झुटको कुनै अर्थ नरहने र नटिक्ने उद्घोष पनि गर्नुभएको छ । ‘सत्य डक्दैन झुटो टिक्दैन भन्ने मूल आदर्शलाई अनुसरण गर्दै सदा इमानदार रहेर असल मानिस भएर बाँच्ने लक्ष्यबाट नडगमगाऔँ । जेनजी पुस्ताले अघि सारेको भ्रष्टाचारको अन्त्य गर्दै समृद्ध नेपाल निर्माण गर्ने अभियानमा ऐक्यबद्धता जाहेर गरौँ । उक्त आन्दोलन आपराधिक तत्त्वहरूको घुसपैठका कारण इतिहासमै नबिर्सने गरी कलङ्कित घट्नाबाट पाठ सिक्दै जेन जी पुस्ताहरू सचेत ढङ्गबाट अगाडि बढ्नुपर्ने जरुरी छ,’ पूर्वमन्त्री गुरुङले भन्नुभएको छ ।
अपिलको पूर्णपाठ
आदरणीय बुबा आमा तथा दाजुभाइ दिदीबहिनीहरू,
प्रिय जेन–जी युवा साथीहरू,
मिति २०८२ भाद्र २३ र २४ गतेको आन्दोलनमा ज्यान गुमाउनु हुनेप्रति गहिरो दुःख व्यक्त गर्दै भावपूर्ण श्रद्धाञ्जली अर्पण गर्दछु । साथै घाइतेहरूको शीघ्र स्वास्थ्य लाभको कामना गर्दछु। शोकमा रहनुभएका परिवारप्रति गहिरो समवेदना व्यक्त गर्दछु ।
अहिले, देश इतिहास मै असहज र कठिन घडीमा छ । हरेक क्षेत्रमा स्वस्थ प्रतिस्पर्धा होइन, बदलाको भावना र आपराधिक मानसिकताबाट प्रतिशोधपूर्ण राजनीतिक गतिविधिले देशलाई आन्तरिक द्वन्द्वमा फसाउँदै दीर्घकालीन अस्थिरतामा पुर्याएर असफल राष्ट्र बन्ने खतरा बढिरहेको । हाल उत्पन्न सङ्कटपूर्ण घटनाक्रमको फाइदा लिँदै ’धमिलो पानीमा माछा मार्ने’ भने झैँ सामाजिक सञ्जाल र डिजिटल प्लेटफर्म मार्फत भ्रमपूर्ण, कपोलकल्पित, प्रायोजित, तथ्यहीन र नक्कली कथा र फेक भिडियो फोटोहरू सम्प्रेषण गरी चरित्रहत्या गर्ने समूहहरू सक्रिय छन् । यसरी प्रविधिको दुरुपयोग गर्दै आपराधिक हरकतबाट समाजमा अशान्ति र अफवाह फैलाउँदै द्वन्द्व सिर्जना गर्नेहरूबाट सचेत रहनुपर्ने देखिन्छ । तसर्थ, देशको विद्यमान सङ्कटबाट विचलित नभई, उच्च मनोबलका साथ देश निर्माणमा सबै नेपाली एकताबद्ध भएर लागौँ ।
अन्त्यमा, ’सत्य डक्दैन झुटो टिक्दैन’ भन्ने मूल आदर्शलाई अनुसरण गर्दै सदा इमानदार रहेर असल मानिस भएर बाँच्ने लक्ष्यबाट नडगमगाऔँ । जेनजी पुस्ताले अघि सारेको भ्रष्टाचारको अन्त्य गर्दै समृद्ध नेपाल निर्माण गर्ने अभियानमा ऐक्यबद्धता जाहेर गरौँ । उक्त आन्दोलन आपराधिक तत्त्वहरूको घुसपैठका कारण इतिहासमै नबिर्सने गरी कलङ्कित घट्नाबाट पाठ सिक्दै जेन जी पुस्ताहरू सचेत ढङ्गबाट अगाडि बढ्नुपर्ने जरुरी छ ।
यस्तो दुखद र पीडादायी घट्नाको बिचमा आएको नेपालीहरूको विशेष चाडपर्व दशैँ, तिहार, नेपाल संवत् र छठको उपलक्ष्यमा सुख, शान्ति, समृद्धि र सुशासनको लागि हार्दिक शुभकामना व्यक्त गर्दछु ।
