दोलखामा प्रमुख जिल्ला अधिकारी नारायणप्रसाद रिसालको प्रतिबद्धता — शान्ति, सुव्यवस्था र सुशासन प्राथमिकतामा
दोलखा, मङ्सिर १९ — हालै महोत्तरी जिल्लाबाट सरुवा भई दोलखा आइपुग्नुभएका प्रमुख जिल्ला अधिकारी (प्रजिअ) नारायणप्रसाद रिसालले जिल्लामा शान्ति, सुव्यवस्था, सुशासन र अपराध न्यूनीकरणलाई मुख्य कार्यसूची बनाएर अघि बढ्ने प्रतिबद्धता जनाउनुभएको छ।
आज दोलखामा आयोजित पत्रकार भेटघाट कार्यक्रममा बोल्दै प्रजिअ रिसालले जिल्लाको सामाजिक शान्ति, सुव्यवस्था कायम गर्नु, सुशासन प्रवर्द्धन गर्नु र अपराधका घटना न्यून पार्नु आफ्नो पहिलो दायित्व हुने बताउनुभयो। उहाँले थप्नुभयो, “प्रशासन जनताको सेवा गर्ने निकाय हो, त्यसैले नागरिकमैत्री सेवा र पारदर्शिता कायम गर्दै सबै निकायबीच सहकार्यमा अघि बढ्नेछौं।”
उहाँले विपद् व्यवस्थापनका लागि पनि पूर्व तयारी र समन्वयलाई मजबुत बनाउने, जोखिम क्षेत्र पहिचान गरी आवश्यक योजना बनाउन लाग्ने जानकारी दिनुभयो। दोलखाको भौगोलिक अवस्था र प्राकृतिक जोखिमका कारण विपद् व्यवस्थापन सधैं चुनौतीपूर्ण हुने भन्दै उहाँले स्थानीय तह र सरोकारवालासँग मिलेर सुरक्षित र सजग जिल्ला बनाउने लक्ष्य राखेको बताउनुभयो।
पत्रकार भेटघाट कार्यक्रममा सहभागी स्थानीय सञ्चारकर्मीहरूले जिल्लामा हुने प्रशासनिक सेवामा अझ प्रभावकारिता ल्याउन, नागरिकको पहुँच सहज बनाउन र सूचना प्रवाहलाई सशक्त बनाउन सुझाव दिएका थिए।
प्रमुख जिल्ला अधिकारी रिसालले पत्रकार र प्रशासनबीच सहकार्य र संवादका माध्यमबाट सकारात्मक परिवर्तन सम्भव हुने विश्वास व्यक्त गर्दै जिल्लाको विकास, सुशासन र सुरक्षाका लागि सबै पक्ष एकजुट हुनुपर्नेमा जोड दिनुभयो।
दोलखामा नयाँ जिम्मेवारीसहित कार्यभार सम्हाल्नुभएका रिसालको आगमनले प्रशासनिक सक्रियता र जनसेवामा नयाँ ऊर्जा थपिने अपेक्षा गरिएको छ।
