आयो फुस्सा” : बजेटमा फेरि ओझेलमा दोलखाको खरिढुङ्गा म्याग्नेसाइट ।
महेन्द्र श्रेष्ठ
काठमाडौं — बजेट सार्वजनिक हुनुअघि दोलखाको अलपत्र अवस्थामा रहेको खरिढुङ्गा म्याग्नेसाइट उद्योग पुनः सञ्चालनको विषय निकै चर्चामा थियो ।
राजनीतिक भेटघाटदेखि स्थानीय तहसम्म “यसपटक उद्योगका लागि ठोस योजना आउँछ” भन्ने अपेक्षा बढाइएको थियो । तर बजेट सार्वजनिक भएपछि भने धेरै दोलखावासी निराश बनेका छन् ।
वर्षौंदेखि बन्द अवस्थामा रहेको खरिढुङ्गा म्याग्नेसाइट उद्योग दोलखाको आर्थिक सम्भावना र रोजगारीसँग जोडिएको महत्वपूर्ण परियोजना मानिन्छ ।
उद्योग सञ्चालनमा आए स्थानीय युवाले रोजगारी पाउने, व्यापार चलायमान हुने र समग्र जिल्लाको अर्थतन्त्रमा सकारात्मक प्रभाव पर्ने अपेक्षा गरिएको थियो ।
तर सार्वजनिक बजेटमा उद्योग सञ्चालनका लागि स्पष्ट योजना, पर्याप्त बजेट विनियोजन वा कार्यान्वयनको ठोस आधार नदेखिएपछि स्थानीयले फेरि “हाती आयो फुस्सा” भएको टिप्पणी गर्न थालेका छन् ।
बजेटअघि ठूलाठूला चर्चा भए पनि परिणाम भने अपेक्षाअनुसार नआएको गुनासो सुनिन थालेको छ ।
स्थानीयवासीका अनुसार खरिढुङ्गा म्याग्नेसाइट उद्योग केवल राजनीतिक भाषणको विषय बन्नु दुःखद हो । हरेक वर्ष आशा देखाइने तर कार्यान्वयन नहुने प्रवृत्तिले जनताको विश्वास कमजोर बनाउँदै गएको उनीहरूको भनाइ छ ।
अब दोलखावासीले भाषण र आश्वासनभन्दा पनि उद्योग सञ्चालनको वास्तविक काम देख्न चाहेका छन् । अन्यथा, हरेक बजेटसँगै दोहोरिने आशा र निराशाको चक्र फेरि उहीँ पुगेर टुंगिने निश्चित देखिन्छ ।
