वर्षायाममै स्टल बजारमा डोजर, ४६ व्यवसायी विस्थापित
दशैंसम्म बस्न दिन माग गरे पनि कमलामाई नगरपालिकाले सटर भत्कायो
महेन्द्र श्रेष्ठ
सिन्धुली । कमलामाई नगरपालिका ले जीर्ण अवस्थामा रहेको स्टल बजारमा शुक्रबार डोजर चलाएको छ । नगरपालिकाले पूर्वसूचना जारी गर्दै हटाउन निर्देशन दिएका स्टल बजारका ४८ वटा सटर भत्काउने काम शुक्रबार दिउँसो १ बजेदेखि सुरु गरिएको हो ।
नगरपालिकाले केही दिनअघि नै स्टल बजार खाली गर्न सूचना जारी गरेको थियो । बुधबार अन्तिम सूचना प्रकाशित भएपछि व्यवसायीहरू सामान व्यवस्थापन गर्न बाध्य बनेका थिए । शुक्रबार डोजर पुगेसँगै वर्षायामकै बीच ४६ जना व्यवसायी विस्थापित भएका छन् ।
वर्षाको समय भएकाले तत्काल व्यवसाय स्थानान्तरण गर्न कठिन भएको भन्दै व्यवसायीहरूले कम्तीमा आगामी दशैंसम्म स्टल बजारमै बस्न दिन नगरपालिकासँग आग्रह गरेका थिए । तर नगरपालिकाले संरचना जीर्ण र जोखिमपूर्ण बनेको निष्कर्ष निकाल्दै भत्काउने निर्णय कार्यान्वयन गरेको जनाएको छ ।
स्टल बजार हटाइएपछि त्यहाँ व्यवसाय गर्दै आएका साना तथा मध्यम व्यवसायीहरू समस्यामा परेका छन् । कतिपय व्यवसायीले वैकल्पिक स्थान नपाउँदा व्यापार नै बन्द गर्नुपर्ने अवस्था आएको बताएका छन् । वर्षायाममा नयाँ ठाउँ खोज्न, सामान सुरक्षित राख्न र व्यवसाय पुनः सञ्चालन गर्न चुनौती थपिएको उनीहरूको गुनासो छ ।
स्थानीय व्यवसायीहरूले नगरपालिकाले समयमै उचित व्यवस्थापन र विकल्प दिन नसकेको आरोप लगाएका छन् । “वर्षाको बेला व्यवसाय हटाउँदा परिवार पाल्न नै समस्या हुने अवस्था आयो,” एक व्यवसायीले दुखेसो पोख्दै भने ।
नगरपालिकाले भने पुरानो तथा जीर्ण संरचनाले दुर्घटनाको जोखिम बढाएको र बजार क्षेत्रलाई व्यवस्थित बनाउन आवश्यक प्रक्रिया अघि बढाइएको जनाएको छ । साथै व्यवसायीहरूको व्यवस्थापनका विषयमा पनि छलफल भइरहेको नगरपालिकाको भनाइ छ ।
स्टल बजार भत्काइएपछि अहिले उक्त क्षेत्रमा चहलपहल कम भएको छ भने विस्थापित व्यवसायीहरू वैकल्पिक व्यवस्थापनको माग गर्दै नगरपालिकासँग पुनः संवादको तयारीमा रहेका छन् ।
