साहित्यिक साधनाको उच्च सम्मान : अग्रज कवि तथा गजलकार जीत कार्की भानु–विद्यापति साहित्य पुरस्कारबाट सम्मानित।
महेन्द्र श्रेष्ठ
दोलखा/ नेपाली भाषा, साहित्य तथा गजल विधामा दशकौँदेखि निरन्तर सिर्जनशील साधनामा समर्पित अग्रज कवि तथा गजलकार जीत कार्की भानु–विद्यापति साहित्य पुरस्कार–२०८३ बाट सम्मानित हुनुभएको छ। आदिकवि भानुभक्त आचार्यको २१३औँ जन्मजयन्तीका अवसरमा आयोजित विशेष साहित्यिक समारोहमा उहाँलाई नगद ११ हजार १११ रुपैयाँ, सम्मानपत्र तथा दोसल्लासहित उक्त पुरस्कार प्रदान गरिएको हो।
दोलखा संस्कृति प्रतिष्ठानको आयोजनामा सम्पन्न कार्यक्रममा साहित्यकार, शिक्षाविद्, बुद्धिजीवी, पत्रकार, विभिन्न संघसंस्थाका प्रतिनिधि तथा साहित्यप्रेमीहरूको उल्लेखनीय उपस्थिति रहेको थियो। कार्यक्रममा नेपाली भाषा, साहित्य र संस्कृतिको संरक्षण तथा प्रवर्द्धनमा पुर्याउँदै आएको योगदानबारे चर्चा गर्दै अग्रज स्रष्टा जीत कार्कीको दीर्घकालीन साहित्यिक यात्राको उच्च मूल्यांकन गरिएको थियो।
दोलखा संस्कृति प्रतिष्ठानका अध्यक्ष शङ्करलाल श्रेष्ठको अध्यक्षतामा सम्पन्न कार्यक्रममा शिक्षा विकास तथा समन्वय इकाइ दोलखाका प्रमुख भरतप्रसाद भट्टराई, भीमेश्वर नगरपालिकाका प्रमुख प्रशासकीय अधिकृत विष्णुप्रसाद सुवेदी, शिक्षा तथा खेलकुद विकास शाखा प्रमुख धर्मिला कार्की, विष्णुलक्ष्मी साहित्यिक पुरस्कार समिति दोलखाका संरक्षक चिरञ्जीवी मास्के, वागमती प्रदेश वन तथा वातावरण मन्त्रालयका प्रतिनिधि भोला खतिवडा, नेपाल पत्रकार महासंघ दोलखाका सचिव सुजन काप्ले तथा भानु–विद्यापति साहित्य प्रतिष्ठानका सचिव सुन्दर खड्कालगायतले शुभकामना मन्तव्य व्यक्त गर्दै आदिकवि भानुभक्त आचार्यको नेपाली भाषा र साहित्यमा रहेको अतुलनीय योगदान तथा उहाँका कृतिहरू आज पनि उत्तिकै सान्दर्भिक रहेको धारणा राख्नुभएको थियो।
वक्ताहरूले साहित्य समाजलाई सभ्य, सचेत र संस्कारित बनाउने महत्वपूर्ण माध्यम भएको उल्लेख गर्दै अग्रज स्रष्टा जीत कार्कीले नेपाली कविता र गजलमार्फत समाजमा सकारात्मक चेतना फैलाउने कार्यमा निरन्तर योगदान पुर्याउँदै आएको बताए। उहाँका रचनाहरूमा मानवीय संवेदना, सामाजिक यथार्थ, प्रेम, संस्कृतिप्रतिको लगाव, राष्ट्रिय भावना तथा समयको चेतना सशक्त रूपमा अभिव्यक्त हुँदै आएको उनीहरूको भनाइ थियो।
जीत कार्की नेपाली साहित्य क्षेत्रमा परिचित र सम्मानित नामका रूपमा स्थापित हुनुहुन्छ। उहाँले लामो समयदेखि कविता, गजल तथा अन्य साहित्यिक विधामार्फत नेपाली साहित्यलाई समृद्ध बनाउन निरन्तर योगदान दिँदै आउनुभएको छ। साहित्यलाई केवल मनोरञ्जनको माध्यमका रूपमा नभई समाजलाई सही दिशा दिने चेतनशील अभियानका रूपमा आत्मसात् गर्दै उहाँ निरन्तर सिर्जनामा सक्रिय रहनुभएको छ। उहाँका साहित्यिक कृतिहरूले पाठकमाझ विशेष स्थान बनाउन सफल भएका छन्।
समारोहमा वक्ताहरूले यस्ता सम्मानले साहित्य सिर्जनामा लागेका स्रष्टाहरूको मनोबल बढाउनुका साथै नयाँ पुस्तालाई साहित्यतर्फ आकर्षित गर्न महत्वपूर्ण भूमिका खेल्ने विश्वास व्यक्त गरे। भानुभक्त र विद्यापतिले स्थापित गरेको समृद्ध साहित्यिक परम्परालाई निरन्तरता दिन यस्ता पुरस्कारको विशेष महत्व रहेको उनीहरूको धारणा थियो।
कार्यक्रमको सञ्चालन भानु–विद्यापति साहित्य प्रतिष्ठानका सचिव सुन्दर खड्काले गर्नुभएको थियो। उहाँको प्रभावकारी र सजीव सञ्चालनले कार्यक्रमलाई थप व्यवस्थित, गरिमामय र स्मरणीय बनाएको सहभागीहरूले बताएका थिए।
भानु–विद्यापति साहित्य पुरस्कार नेपाली भाषा, साहित्य र सिर्जनशीलताको सम्मानस्वरूप प्रदान गरिने प्रतिष्ठित पुरस्कारमध्ये एक हो। यस वर्ष अग्रज कवि तथा गजलकार जीत कार्की यस सम्मानबाट विभूषित हुनु दोलखाको साहित्यिक इतिहासका लागि मात्र नभई समग्र नेपाली साहित्य जगतकै गर्व र गौरवको विषय बनेको छ।
साहित्य समाजको ऐना मात्र होइन, परिवर्तनको प्रेरक शक्ति पनि हो। यही विश्वासका साथ दशकौँदेखि निरन्तर कलम चलाउँदै आउनुभएका अग्रज स्रष्टा जीत कार्कीलाई प्रदान गरिएको यो सम्मानले नेपाली साहित्यको उन्नयन, स्रष्टाहरूको हौसला अभिवृद्धि तथा नयाँ पुस्तामा सिर्जनशील चेतनाको विकासमा थप ऊर्जा प्रदान गर्ने विश्वास गरिएको छ।
