दोलखाले गुमायो एक साहसी हिमाल आरोही
महेन्द्र श्रेष्ठ
दोलखा
दोलखा जिल्लाले आफ्नो एक साहसी, अनुभवी र प्रेरणादायी हिमाल आरोही गुमाएको छ। गौरीशंकर गाउँपालिका–९, बेदिङ निवासी, माउन्ट एभरेस्ट समिटर्स क्लबका सदस्य तथा ख्यातिप्राप्त हिमाल आरोही किलु पेम्बा शेर्पा (४५) को पाकिस्तानस्थित ८,०४७ मिटर अग्लो ब्रोड पिक हिमाल आरोहणका क्रममा भएको असामयिक निधनको खबरले समग्र दोलखा जिल्ला शोकमा डुबेको छ।
हिमालसँग संघर्ष गर्दै अनेकौँ चुनौतीलाई साहसपूर्वक पार गरेका किलु पेम्बा शेर्पा अब सम्झनामा मात्र सीमित भएका छन्। उहाँको निधनले केवल एक परिवारले आफ्नो प्रिय सदस्य मात्र गुमाएको छैन, दोलखाले आफ्नो एक निडर पर्वतारोही, शेर्पा समुदायले एक गौरवपूर्ण व्यक्तित्व र नेपालले एक साहसी हिमाल आरोही गुमाएको छ।
उहाँले हिमाल आरोहणको क्षेत्रमा पुर्याउनुभएको योगदान, देखाउनुभएको साहस र आगामी पुस्तालाई दिएको प्रेरणा सदैव स्मरणीय रहनेछ। जोखिमलाई अवसरमा बदल्ने उहाँको आत्मविश्वास र हिमालप्रतिको समर्पणले धेरै युवालाई नयाँ सपना देखाएको थियो।
आज बेदिङ गाउँ मात्र होइन, समग्र दोलखा जिल्ला शोकाकुल बनेको छ। उहाँसँग बिताएका सम्झना, उहाँको मुस्कान र साहसका कथा अब सबैका मनमा अमिट छाप बनेर रहनेछन्।
दिवंगत किलु पेम्बा शेर्पाप्रति हार्दिक श्रद्धाञ्जली अर्पण गर्दै उहाँको आत्माको चिरशान्तिको कामना गर्दछौं। साथै शोकसन्तप्त परिवार, आफन्तजन, साथीभाइ तथा सम्पूर्ण शेर्पा समुदायप्रति गहिरो समवेदना व्यक्त गर्दछौं।
“हिमालको शिखर जित्न हिँडेको एक साहसी योद्धा आज हामीमाझ नभए पनि, उहाँले छोडेर जानुभएको साहस, समर्पण र प्रेरणाको उचाइ सधैँ जीवित रहनेछ।”
