जेठ २८- नेकपा एमाले दोलखाले दुई महिने श्रमदान अभियान सञ्चालन गर्ने भएको छ । नेकपा एमाले जिल्ला कमीटी दोलखाको छैटौ पुर्ण बैठकले जिल्लामा आगामी असार र साउन महिना खेतीपातीको समय भएकाले पालिका र वडा कमिटीहरुले जिल्ला भित्रका एकल महिला,जेष्ठ नागरिकलाई कृषि उत्पादन कार्यमा सहयोग गर्न श्रमदान अभियान सञ्चालन गरी उत्पादनमुखी अभियान सञ्चालन गर्ने निर्णय गरेको हो ।
उक्त अवधिमा राजधानीमा रहेका दोलखा जिल्लाका नागरिकहरुमा पाटी काम विस्तार गर्न केन्द्रीत हुने निर्णय गरिएको छ भने बैठकले आवश्यकता अनुसार दोलखा काठमाडौ सम्पर्क मञ्च,पालिका कमिटी, वडा कमिटी र जनसंगठनलाई परिचालन गर्ने निर्णय गरिएको नेकपा एमाले दोलखाका उपसचिव एंव प्रचार विभाग प्रमुख हरि ओलीले जानकारी दिनुभयो ।उहाँँका अनुसार पार्टीको बैठकले मौसमजन्य विपदका लागि पूर्व तयारी र सावधानीहरु अपनाउन सम्पुर्ण पाटी नेता,कार्यकर्ताहरुलाई अनुरोध गर्नुका साथै मातहत कमिटीले सचेतना कार्यक्रमहरु सञ्चालन गर्ने गरिएको छ ।
नेकपा एमाले दोलखाका अध्यक्ष नर बहादुर श्रेष्ठको अध्यक्षतामा भएको बैठकले आर्थिक वर्ष २०८२÷८३ स्थानीय सरोकारको विषयमा केन्द्रित रहेर नीति तथा कार्यक्रम र बजेट बनाउन पहलकदमी लिनका लागि पालिका कमिटी र वडा कमिटीको बैठक बसी सम्बन्धित पालिकाहरुमा बुझाउन निर्देशन गरेको छ ।
