दोलखा / भीमेश्वर – २०८२ जिल्ला प्रहरी कार्यालय दोलखाको आयोजनामा ७० औं प्रहरी दिवस भव्य रूपमा मनाइयो। “नागरिक प्रहरी सहकार्य, सुरक्षाको लागि अपरिहार्य” भन्ने नारासहित सम्पन्न कार्यक्रममा समाजसेवा, अनुशासन र सुरक्षामा प्रहरीको योगदानलाई उच्च सम्मानका साथ प्रस्तुत गरिएको थियो।
कार्यक्रममा ३ जनालाई अमर प्रहरी परिवार सम्मान, २ जना पूर्व जेष्ठ प्रहरीलाई विशेष सम्मान, १७ जनालाई कदरपत्र र १५ जनालाई प्रहरी पुरस्कार प्रदान गरिएको थियो। यी सम्मानहरूले प्रहरी सेवामा समर्पण, इमानदारी र जिम्मेवारीका उदाहरणहरूलाई सम्मान गरिएको आयोजकले जानकारी दिएको छ।
प्रहरी दिवसको अवसरमा जिल्ला प्रहरी कार्यालय दोलखाले विभिन्न सामाजिक सेवा कार्यक्रमहरू पनि सञ्चालन गरेको थियो। कार्यक्रममा रक्तदान कार्यक्रम, सफाइ अभियान, र वृक्षारोपण कार्यक्रम समेत सम्पन्न गरियो। यी गतिविधिहरूले प्रहरी र समुदायबीचको सहकार्यलाई अझ बलियो बनाउन सहयोग पुर्याएको स्थानीयहरूको भनाइ रहेको छ।
कार्यक्रममा स्थानीय जनप्रतिनिधि, समाजसेवी, सुरक्षाकर्मी, नागरिक समाजका प्रतिनिधि तथा सञ्चारकर्मीहरूको उल्लेखनीय उपस्थिति रहेको थियो।
प्रहरी दिवसले प्रहरी र नागरिकबीचको सम्बन्धलाई अझ सुदृढ बनाउन, शान्ति र सुरक्षाको महत्त्वलाई उजागर गर्न, र आगामी दिनमा अझ जिम्मेवार प्रहरी सेवा सुनिश्चित गर्ने लक्ष्य लिएको आयोजकले बताएको छ।
प्रधान सम्पादक
महेन्द्र श्रेष्ठ
