भीमेश्वर नगरपालिका मेयर ईश्वरनारायण (ईश्वर) मानन्धर र उप–मेयर कमला बस्नेतकाे नेतृत्वमा स्थानीय सरकारकाे क्षमता अभिवृद्धि र अनुभव आदान–प्रदान गर्ने उद्देश्यले “स्थानीय सरकार असल अभ्यास आदान–प्रदान राष्ट्रिय कार्यशाला” आयोजना गरिने भएको छ ।
नगरपालिकाको पहलमा र स्थानीय सरकार सशक्तीकरण कार्यक्रमको सहकार्यमा आयोजना हुन लागेको यो राष्ट्रिय कार्यशालामा देशभरका स्थानीय तहका जनप्रतिनिधि, प्रमुख प्रशासकीय अधिकृत, नीति निर्माताहरू र विकास साझेदारहरूको सहभागिता रहनेछ ।
मेयर मानन्धरका अनुसार यस कार्यशालाको मूल उद्देश्य स्थानीय तहले अपनाएका नवीन, प्रभावकारी र दिगो अभ्यासहरूलाई राष्ट्रिय तहमा साझा गर्ने, आपसी अनुभव आदान–प्रदानबाट सिकाइ विस्तार गर्ने र आगामी नीतिगत तथा व्यवहारिक सुधारका लागि मार्गनिर्देशन तयार गर्नु हो । उहाँले भन्नुभयो, “भीमेश्वर नगरपालिका निरन्तर सुधार, पारदर्शिता र उत्तरदायित्वकाे अभ्यास गर्दै आएको छ । हामीले सिकेका असल अभ्यास अन्य स्थानीय तहसँग बाँड्न र उनीहरूबाट पनि सिक्न यो कार्यशाला महत्वपूर्ण अवसर हुनेछ ।”
उप–मेयर कमला बस्नेतले भने स्थानीय तहबीच सहकार्य र साझेदारीको संस्कृतिले मात्र समृद्ध, सशक्त र उत्तरदायी स्थानीय शासन सम्भव हुने बताइन् । उहाँका शब्दमा, “महिलामैत्री नीति, लैङ्गिक सन्तुलन, नागरिक सहभागीता र सामाजिक समावेशीताको विषयमा भीमेश्वर नगरले देखाएका अभ्यासहरू अन्य नगरका लागि पनि मार्गदर्शक बन्नेछन् ।”
कार्यशाला कात्तिक २७ र २८ गते भीमेश्वर नगरपालिकामा सम्पन्न हुने तयारी गरिएको छ । यस अवसरमा देशभरका स्थानीय सरकारका उत्कृष्ट अभ्यासहरू प्रस्तुत गरिने, अन्तरक्रिया सत्रहरू सञ्चालन गरिने र नीतिगत सिफारिसहरू संकलन गरिनेछ ।
भीमेश्वर नगरपालिका यो कार्यक्रममार्फत स्थानीय शासनमा पारदर्शिता, जवाफदेहिता र नागरिक सशक्तीकरणको सन्देश सम्प्रेषण गर्न प्रतिबद्ध रहेको जनाएको छ ।
