नेकपा एमाले दोलखा जिल्ला कमिटीद्वारा कात्तिक २९ गते आयोजना गरिने ऐतिहासिक आमसभा र त्यसको पूर्वसन्ध्यामा कात्तिक २८ गते हुने मोटरसाइकल यात्राको तयारी तीव्र रूपमा अघि बढाइएको छ।
कार्यक्रमअनुसार कात्तिक २९ गते बिहान ११:०० बजे चरिकोट सातदोबाटोबाट जुलुस सुरु हुनेछ, जसले बजार परिक्रमा गर्दै पुनः सातदोबाटोमै पुगेर विशाल आमसभामा परिणत हुनेछ। त्यसअघि, कात्तिक २८ गते दिउँसो ३:०० बजे चरिकोट सातदोबाटोबाट मोटरसाइकल यात्रा सुरु हुने छ, जसले पार्टीको जनपरिचालन अभियानलाई थप ऊर्जा र उत्साह प्रदान गर्ने उद्देश्य लिएको छ।
उक्त तयारीलाई सफल र प्रभावकारी बनाउन नेकपा एमाले दोलखा जिल्ला कमिटी, नगर कमिटी तथा विभिन्न जनसंगठनका प्रतिनिधिहरूबीच निरन्तर छलफल र समन्वय बैठकहरू भईरहेका छन्। कार्यक्रममा व्यापक जनसहभागिता सुनिश्चित गर्न सबै एमाले समर्थक, शुभचिन्तक, पार्टीका नेता–कार्यकर्ता र जनसंगठनका प्रतिनिधिहरूलाई हार्दिक अनुरोध गरिएको छ।
जानकारी अनुसार, यी कार्यक्रमहरू नेकपा एमाले दोलखा जिल्ला कमिटीका उपाध्यक्ष राजेन्द्र मानन्धरको समन्वय र नेतृत्वमा भइरहेको तयारीअन्तर्गत पर्दछन्। पार्टीले यो अभियानलाई जिल्ला स्तरमा जनसंपर्क, संगठन सुदृढीकरण र आगामी राजनीतिक गतिविधिलाई सशक्त बनाउने अवसरका रूपमा लिएको जनाएको छ।
सम्पर्क, सहभागिता र एकताको सन्देशसहित –
एमाले दोलखा जुट्दैछ, सशक्त रूपमा अघि बढ्दैछ।
