तामाकोसीमा फसेका कामदारको सेना, सशस्त्र र नेपाल प्रहरीद्वारा सकुशल उद्धार
महेन्द्र श्रेष्ठ
तामाकोसी नदीको बीच भागमा फसेका २३ वर्षीय अभियान थामीको रातारात उद्धार
सिंगटी, दोलखा । तामाकोसी नदीको बीच भागमा अलपत्र परेका कालिञ्चोक गाउँपालिका–४ का २३ वर्षीय अभियान थामीको नेपाली सेना, सशस्त्र प्रहरी र नेपाल प्रहरीको संयुक्त टोलीले सकुशल उद्धार गरेको छ।
बिहीबार साँझ माछा मारेर घर फर्किने क्रममा नदीको बहाव बढेपछि थामी तामाकोसीको बीच भागमा फसेका थिए। घटनाको जानकारी पाएलगत्तै सशस्त्र प्रहरी बल नं. १८ गुल्म, मनसुन प्रतिकार्य बेस सिंगटी, नेपाली सेना र नेपाल प्रहरीको संयुक्त टोली उद्धारका लागि परिचालन भएको थियो।
रातिको समयमा नदीको बहाव तीव्र रहे पनि सुरक्षाकर्मीले जोखिम मोलेर उद्धार अभियान सञ्चालन गरेका थिए। संयुक्त टोलीको निरन्तर प्रयासपछि राति करिब १०ः५० बजे थामीलाई सकुशल उद्धार गरिएको हो।
उद्धारपछि उनलाई सुरक्षित स्थानमा ल्याइएको छ। सुरक्षाकर्मीको समयमै भएको सक्रियताका कारण सम्भावित ठूलो दुर्घटना टरेको छ।
वर्षायाममा तामाकोसीलगायत नदी तथा खोलामा पानीको बहाव बढ्ने भएकाले स्थानीयवासीलाई नदी किनार तथा जोखिमपूर्ण क्षेत्रमा आवतजावत गर्दा विशेष सावधानी अपनाउन आग्रह गरिएको छ।
